ഇന്ന് രാജസ്ഥാനി നാടോടി ഗായകരിൽ പ്രശസ്തനായ മമെ ഖാനെയും അദ് ദേഹത്തിന്റെ സംഗീതത്തെയും പരിചയപ്പെടാം..
തിരുവനന്തപുരത്ത് വച്ചു നടന്ന അദ് ദേഹത്തിന്റെസംഗീത പ്രോഗ്രാമിലേക്ക്.....
സുന്ദരീ സുന്ദരീ ഒന്നൊരുങ്ങി വാ
നാളെയാണ് താലിമംഗലം…
-മമെ ഖാന്‍ പാടി. വസന്ത രാഗത്തില്‍ രവീന്ദ്രന്‍ മാഷ് ചിട്ടപ്പെടുത്തിയ ഈണത്തിലൊന്നുമായിരുന്നില്ല പാട്ട്. ഥാര്‍ മരുഭൂമിയുടെ ചൂടും ചൂരുമുള്ള സൂഫി രാഗത്തില്‍. 13 വര്‍ഷം മുമ്പ് ആദ്യമായി കേരളത്തിലെത്തിയപ്പോള്‍ അന്ന് സഞ്ചരിച്ച കാറിന്റെ ഡ്രൈവര്‍ ബാബു പഠിപ്പിച്ചതാണ്. സംഗീതം എവിടെയായാലും സംഗീതമാണ്, രാജസ്ഥാനിലായാലും കേരളത്തിലായാലും.
ബോലെ തൊ മിഠൊ ലാഗെ
ഹസെ തൊ പ്യാരോ ലാഗെ..
https://youtu.be/wy2eULa2fx0
രാജാക്കന്മാരുടെയും കവികളുടെയും സമ്പന്നമായ ചരിത്രമുറങ്ങുന്ന സ്ഥലമാണ് ജയ്‌സാല്‍മര്‍. കാലമുള്‍പ്പെടെ എല്ലാ അതിര്‍വരമ്പുകള്‍ക്കും അതീതമായി ഇവിടത്തെ ഹിന്ദു -മുസ്‌ലിം ആദ്ധ്യാത്മികത നിലകൊള്ളുന്നു. മമെ ഖാന്റെ സംഗീതം ഈ പ്രൗഢ പാരമ്പര്യത്തിന്റെ ഭാഗമാണ്.
മൈ തോ ഗയാ മാരാ
ആകെ യഹാം രേ
ആകെ യഹാ രേ..
-ദൈവത്തിന്റെ ശബ്ദമെന്നാണ് മമെ ഖാന്‍ പറഞ്ഞത്. യേശുദാസിന്റെ നാട്ടില്‍ വന്ന് ആ പാട്ട് പാടിയിട്ട് അദ്ദേഹം ഇത്രകൂടി പറഞ്ഞു -‘ഇത് നിങ്ങളുടെ മാത്രം ദൈവമല്ല, എന്റെയും ദൈവമാണ്.’
https://youtu.be/qm2zL3A1w0c
സിന്ധിലെ സൂഫി കവികളായ മീരാ ബായി, കബീര്‍, ലാല്‍ ഷാബാസ് ഖലന്ധന്‍, ബുല്ലേ ഷാ, ബാബാ ഗുലാം ഫരീദ് എന്നിവരുടെ രചനകളും മമേ ഖാന്‍ വേദിയിലെത്തിക്കാറുണ്ട്. അദ്ദേഹത്തിനുണ്ടായിരുന്ന ആരോഗ്യപ്രശ്‌നം നിമിത്തം പൂര്‍ണ്ണതോതില്‍ ഇവ ആസ്വദിക്കാനുള്ള അവസരം ഇത്തവണ ഉണ്ടായില്ല. എങ്കിലും ഒട്ടും മോശമായില്ല എന്നു തന്നെ പറയാം.
തുടക്കം മുതല്‍ ഒടുക്കം വരെ ത്രസിപ്പിക്കുന്ന അനുഭവം. ഡോലിന്റെ ദ്രുതതാളമാണ് ആസ്വാദകരെ വരവേറ്റത്. ആ താളലയം പതുക്കെ കെട്ടടങ്ങിയതോടെ എങ്ങുനിന്നോ അശരീരി പോലെ ആ ശബ്ദം-
കേസരിയാ ബാലം ആവോനീ പധാരോനീ മാരെ ദേശ് രേ
പധാരോനീ മാരേ ദേശ്
https://youtu.be/1gukvtH_a3I
സമീപകാലത്ത് മമെ ഖാന്റേതായി വന്ന ഏറ്റവും വലിയ ഹിറ്റാണ് ചൗധരി. പഞ്ചാബിയായ ശൈലേന്ദ്ര സിങ് എഴുതി ഗുജറാത്തിയായ അമിത് ത്രിവേദി ചിട്ടപ്പെടുത്തി രാജസ്ഥാനിയായ മമെ ഖാന്‍ പാടുന്ന ഗാനം. ഈ പാട്ട് അദ്ദേഹം പാടുമ്പോള്‍ നിശാഗന്ധിയില്‍ മുഴുവന്‍ മൊബൈല്‍ ഫ്‌ളാഷുകള്‍ മിന്നി, ഒരു ക്രിക്കറ്റ് സ്റ്റേഡിയത്തിലെന്ന പോലെ. ഒടുവില്‍ അവസാനഗാനമായി ദമാ ദം മസ്ത് കലന്ദര്‍ എത്തിയപ്പോള്‍ ആവേശം മൂര്‍ദ്ധന്യത്തിലായി.
ഇത്രയും കാലം മമെ ഖാന്റെ നിഴലിലായിരുന്ന സദ്ദാം ഖാന്‍ എന്ന ഗായകന്റെ ഉദയത്തിനും നിശാഗന്ധി സാക്ഷ്യം വഹിച്ചു. മമെ ഖാനോടൊപ്പം സദ്ദാം കൂടിയിട്ട് 9 വര്‍ഷമായി. പിന്നണിയില്‍ സാരംഗി വായിക്കുന്നതിനൊപ്പം വായ്പ്പാട്ടില്‍ അകമ്പടിയാണ് പതിവ്. തന്റെ മോശം ആരോഗ്യനില പരിപാടിയുടെ നിലവാരത്തെ ബാധിക്കാതിരിക്കാനാണ് മമെ ഖാന്‍ സദ്ദാമിനെ മുന്നിലേക്കു കൊണ്ടുവന്നത്. ഇക്കാര്യം മമെ ഖാന്‍ തന്നെയാണ് പറഞ്ഞത്. കിട്ടിയ അവസരം സദ്ദാം വളരെ മികച്ച രീതിയില്‍ തന്നെ പ്രയോജനപ്പെടുത്തുകയും ചെയ്തു.
https://youtu.be/0UZ-9j7kJKw
രാജസ്ഥാനില്‍ നിന്നെത്തിയത് എല്ലാം കൊണ്ടും മികച്ച ഒരു സംഘമായിരുന്നു. ഹാര്‍മോണിയത്തില്‍ കട്ട നിരത്തുന്നതിനൊപ്പം അമീന്‍ ഖാന്‍ വായ്പ്പാട്ടിലും അകമ്പടിയേകി. മൊഹര്‍ശംഖിലും ഭാപഗിലും ഫിറോസ് ഖാന്‍ അത്ഭുതപ്പെടുത്തി. ധോലില്‍ സ്വരൂപ് ഖാന്‍, കര്‍താലില്‍ ഷാഫി ഖാന്‍, കീബോര്‍ഡില്‍ അമോല്‍ ധാംഗി -എല്ലാവരും ഒന്നിനൊന്ന് മികച്ചവര്‍.
സംഗീതം ആസ്വദിക്കൂ.' കൂട്ടിച്ചേർക്കലുകൾ ഉണ്ടാകട്ടെ..🙏🏻🙏🏻🙏🏻